CEBU, Philippines — Nakadawat na kagahapon og ayuda gikan sa kagamhanan sa dakbayan sa Sugbo ang duha ka sitio sa Barangay Tejero nga nasunogan karong buwana.
Nangulo sa pag-apod-apod sa ayuda ngadto sa sitio Laurente ug sitio Black Blessed sa barangay Tejero mao ang Department of Social Welfare and Services DSWS.
Mokabat sa 135 ka nasunogan sa duha ka sitio ang nakadawat ug hinabang financial ug housing materials.
Dul-an sa 1.3milyon ka pesos ang gipagawas nga pundo sa siyudad alang sa mga nasunogan sa barangay Tejero.
Nasayran dunay mokabat sa 27 ka tag-iya og panimay ang hingpit nga naugdaw samtang duha ang partially burned diin sila nakadawat og tag P20mil matag usa.
Mokabat usab sa 28 ka house sharers o extended families ug 39 ka nag-abang ang nakadawat og tag P10mil.
Samtang ang absentee structure owners ug 29 ka lodgers, ang nakadawat usab og P5 mil matag usa.
Pito ka slightly damaged nga mga balay ang nahatagan og housing materials sa city government. Hinuon wa pa gibutyag kun pila ang balor sa maong mga materyales.
Ang Department of Social Welfare and Services(DSWS) miingon nga ang ayuda sa mga fire victims sa uwahing sunog sa barangay Tejero ang padayon pa nga gi proseso. (BANAT NEWS)