CEBU, Philippines — Tulo ka mga bata ang nakalas human sila nangalumos sa Sitio Camaya-an, Barangay Malabugas, Bayawan City, Negros Oriental adlaw nga Sabado apan Domingo na kini sa udto nataho ngadto sa kapulisan.
Ang nakalas naila nga sila si Genalyn Villagracia, 11, Helmar Villagracia, silang Genalyn ug Helmar managsuon samtang si Lance Villagracia ilahang ig-agaw, pulos residente sa Sitio Doldol, Barangay San Roque sa maong siyudad.
Alas-12:30 sa udto niadtong Domingo, dunay nangayo og tabang sa kapolisan kay dunay patay ng lawas sa bata nga napadpad sa baybayon sa Sitio Camaya-an Barangay Malabugas.
Nasuta sa kapolisan nga ang bata usa sa tulo ka mga batang na-missing niadtong Sabado sa hapon sa Purok Lower sa mao gihapong barangay samtang sila nangaligo sa dagat uban sa ilang ginikanan.
Nasuta nga upat gyud unta ka mga batang manag-agaw ang nangalumos, apan nasalbar ang maguwang. Ang tulo gituohang nadala sa sulog ug bawod sa dagat ug nanga-missing.
Unang nakit-an ang lawas ni Genalyn mga 1.7km gikan sa nahitaboan ug gidala sa Bayawan District Hospital apan nakutloan gayud kini sa iyang kinabuhi, samtang ang CDRRMO sa Bayawan mipadayon sa pagpangita sa laing duwa nga nangawala.
Alas-5 sa kaadlawon sa Domingo usa ka Wilfredo Abergas nakakita og lawas sa bata sa maong baybayon sa bata ug kini naila nga si Helmar, paglabay sa 30 minutos sunod nga nakit-an ang lawas ni Lance ug gidala sa tambalanan apan gideklarar nga patay na. (BANAT NEWS)