CEBU, Philippines — Hapsay ug malinawon ang unang adlaw nga pagbukas sa klase sa pambublikong tunghaan kagahapon Agosto 29, 2023 kini sigon pa sa Police Regional Office (PRO)-7.
Matod ni Police Lieutenant Colonel Gerard Ace Pelare, tigpamaba ni PRO-7 Regional Director Brigadier General Anthony Aberin wala sila’y natala nga mga bati nga panghitabo.
Apan nasinati gyud ang paghuot sa dagan sa trapiko nga gihulagway sa kapulisan nga normal gumikan nanggawas ang mga sakyanan nga naghatod sa mga tinun-an.
Mitabang sa pagmando sa trapiko ang kapolisan. Dunay 600 ka Police Assistance Desks(PADS) ang gibutang sa nagkadaiyang public schools ug kapin sa dos mil ka polis ang gipakatap sa rehiyon.
Patambungon sab ang mga Chief of Police sa meeting sa Parents Teachers Association(PTA) aron mapaabot nila ang security nga gihimo sa PRO-7. Lakip sab sa gibantayan sa kapulisan nga malikayan kining panagtapok sa mga kabatan-onan nga moresulta na hinoon sa kagubot.
Mo-sit in sab sa klase ang Police Community Relations Officers aron mohatag og gamay’ng mensahe mahitungod niini ingon man paghatag og safety tips. IBM (BANATNEWS)