200 ka bata ug hamtong nakaambit sa feeding program

CEBU, Philippines — Mokabat sa 200 ka mga bata ug hamtong sa Barangay Tinago ning Dakbayan sa Sugbo ang nakaapil sa feeding program nga gipaambit sa Alejandro Welfare Center (AWC).

Matud pa ni Melchor Alejandro ang nagdumala sa AWC nga nipahigayon sila sa maong feeding program tungod kang Enrico Solon usa sa mga residente sa maong dapit, diin sa dihang buhi pa ang inahan niini kanunay kini mohimo ug nutrition program sa Barangay tinago ug San Roque.

Gihangop sa mga bata ug hamtong ang gipaambit nga paniudto nga naglangkob sa menudo, puso ug tubig.

Ang maong kalihukan gisugdan sa usa ka santos nga misa aron dili lang pagbusog sa ilang kaugalingon pinaagi sa pagkaon apan mabusog usab ang ilang kalag pinaagi sa pulong sa Ginoo.

Nasayran nga duha na ka higayon nga gihimo sa AWC ang maong kalihukan diin una sa Barangay San Roque niadtong Hulyo 17, 2023.

Ang maong kalihukan gisuportahan usab kini sa Triskelion de San Roque Chapter.

Makita sa kabataan ang kalipay ug dako usab ilang pasalamat ngadto sa sponsors. (BANAT NEWS)