CEBU, Philippines — Gikasohan og arbitrary detention, kalapasan sa Akta Republika 3019 kun “Anti-Graft and Corrupt Practices Act”, Kalapasan sa Section 4 (c) sa Akta Republika 6713 kun “Code of Conduct and Ethical Standards of Public Officials and Employees”, kalapasan sa Executive Order 292, Administrative Code of the Philippines specifically Section 46 (b-2) -Oppression, (b4) Grave Misconduct, (b-27) - conduct prejudicial to the best interest of the service ug kalapasan sa article III sa Bill of Rights sa Constitution diha sa Visayas Ombudsman ang 50 ka kawani sa kagamhanan sa Dakbayan sa Mandaue.
Ang maong pagpasaka og kaso kalabot kini sa pagsulod nila sa usa ka private property nga gipanag-iya ni Maria Priscilla Melendres diha sa Barangay Paknaan sa maong siyudad niadtong Mayo 3, 2023.
Matud ni Melendres nga gawas nga ilegal ang pagsulod nila sa property gi-padlock usab ang duha ka gate niini hinungdan nga natanggong siya sa sulod.
Si Melendres nangangkon nga aduna siya’y katungod sa maong property diin anaa siya’y gihuptan nga Tax Declaration No. 2017-021-00300.
Base sa affidavit nga gisumiter ngadto sa Visayas Ombudsman, gusto niini nga mapaubos og 90 ka adlaw nga suspension ang nahisgutang mga kawani.
Si Melendres nisang-at sa iyahang reklamo niadtong Hulyo 24, 2023.
Si Atty. Julius Caesar Entice, acting city assessor sa Dakbayan sa Mandaue ug usa sa gikasohan nagkanayon nga wala siya makadawat og subpoena mahitungod sa kasong kriminal nga gisang-at batok kaniya ug ang laing 49 ka kawani sa siyudad.
Gikwestiyon ni Entice ang pagpasaka og arbitrary detention ni Melendres nga gawasnon man kini sukwahi sa pangangkon niini nga siya gitanggong. Gikwestiyon usab ni Entice ang pagpangangkon ni Melendres sa property tungod kay usa kini ka timberland. —/BDB (BANAT NEWS)