Mga polis ipakatap sa mga tunghaan sa pagbukas sa klase

CEBU, Philippines — Andam na ang kapolisan sa Cebu City Police Office (CCPO) alang sa umaabot nga pagbukas sa klase karong Agosto 29, 2023 kini maoy gibutyag ni CCPO Director Police Colonel Ireneo Dalogdog.

Matud ni Col. Dalogdog nga kada eskwelahan dunay mga police nga ipakatap ug abagan sab sila sa mga Barangay Public Safety Officers (BPSO).

Gawas sa police visibility motabang sab sila sa pagpatunhay sa dagan sa trapiko ilabi na sa gawas sa mga tunghaan.

Nagkanayon sab si Col. Dalogdog kun tingpamauli na sa mga tinun-an kinahanglan makita ang mga mobile patrol units aron masiguro nga wala y mga krimen nga mahitabo.

Karon ato gyud ginagamit ning atong mga force multipliers kaning atong mga kuan in coordination sa atong sa eskwelahan para lang gyud maplastar ang atong seguridad , suma ni Col. Dalogdog.

Gihimug-atan ni Col. Dalogdog nga importante gyud kaayo ang kapolisan nga naa sa tunghaan aron mapakgang ang mga tawo nga nagtinguhang mohimo og dautan.

Nasayran nagsugod kagahapon Agosto 14, 2023 ang Brigada Eskwela ug matapos kini karong Agosto 19 diin nagtinabangay ang mga ginikanan, mga magtutudlo ug uban pa aron mapanindot ang mga lawak-saringan ug uban pang dapit sa mga publikong eskwelahan sa dili pa ang pagbukas sa klase.  (BANAT NEWS)