CEBU, Philippines — Ang turismo maoy usa sa mga nag-unang punto nga gituki ni Cebu Governor Gwendolyn Garcia sa iyang 2023 State of the Province Address (SOPA) nga gipahigayon niadtong Agosto 11, 2023 diha Capitol Social Hall. Sa iyahang usa ka oras ug 33 minutos nga SOPA nga nakaangkon og 76 ka pakpak, si Garcia nipadayag sa mga kalamposan sa Sugbo ubos sa pagbalik sa mga proyekto ug atraksiyon sa turismo.
Gitumbok sa gobernador nga niadtong Agosto 2020, iyang subling gibuksan ang turismo sa tibuok probinsiya ug nahimong unang LGU nga nihimo niini.
Ug gumikan niini, ang Sugbo maoy labing andam nga modawat sa pagbangon sa turismo isip pagbawi sa turismo sa niaging duha ka tuig.
Niadtong tuig 2022, ang Suroy-Suroy sa Habagatan nibalik ug niining tuiga, ang Suroy-Suroy nangulo sa liboan ka turista sa amihanan, sa Camotes Islands, ug sa kasadpan nga naglangkub sa tanang local government units sa Sugbo.
Matud ni Garcia nga ang Suroy-Suroy dili lang nagpalambo sa turismo sa countryside nagdasig usab sa ekonomikanhong kalihokan ug kalamboan ug si Secretary of Tourism Christina Garcia-Frasco nisagop niini pinaagi sa Department of Tourism’s nga Philippine Experience Program.
Ang DOT sa ilang Facebook post nagkanayon nga ang inspirasyon niining malamposon nga programa gipasiugdahan ni Garcia niadtong 2008 diin si Frasco nilusad sa nationwide Philippine Experience Program: Heritage, Culture, and Arts Caravan, nga himuon sa matag rehiyon aron maparehas ang mga promosyon sa turismo.
Ang gobernador nagkanayon usab nga ang kagamhanan sa probinsiya komitado sa pagpamuhonan sa mga imprastraktura sa turismo labaw sa ilang gipaayo nga mga dalan, kini naglakip sa paglusad sa DOT sa upat ka Tourist Rest Areas sa Medellin, Carmen, Carcar, ug Moalboal.
Gipadayag usab ni Garcia nga sa niaging tuig, human sa duha ka tuig nga pagpahulay, nibalik ang Pasigarbo sa Sugbo ubos sa dako nga partisipasyon sa 52 ka LGUs apil na ang Cebu City ug Lapu-Lapu City isip guest contingents ang nisalmot.
Gitaho usab ni Garcia ang pagbalik na sa sports tourism pinaagi sa Gobernador Gwen Garcia Unity Volleyball Cup (GUV Cup) nga gisalmotan sa halos tanang LGU sa Probinsiya sa Sugbo ug nahimong mas malambuon pinaagi sa pagsalmot sa duha ka independenteng siyudad sa Lapu-Lapu ug Cebu City.
Gihisgotan usab ni Garcia ang pagbalik sa dancing inmates sa Cebu Provincial Detention and Rehabilitation Center (CPDRC) ubos sa popular demand.
Lakip sa mga kalamboan nga nalakip sa gihisgotang ni Garcia ang Sugbo Negosyo, paglusad sa Sugbo Baboyan sa Tugkaran ug Caravan of Service. — /BDB (BANAT NEWS)