CEBU, Philippines — Nangayo og pagsabot ug pasensya sa publiko si Cebu City Councilor Jerry Guardo gumikan kay matud pa niya nga ang nagpadayong konstruksyon sa drainage system project sa dakbayan maoy usa sa mga hinungdan sa pagbaha sa kadalanan karong panahon sa tingulan.
Giingong pipila sa mga kinalot nga waste materials ang nakababag sa mga agianan sa tubig sa dakbayan kay inay nga hakuton anha lang kini gitambak sa kilid mismo sa mga sapa nga gitrabaho maong nigamay na hinuon ang agianan sa tubig.
“Mo bottleneck man siya diri,busa naay tendency mo back flow ang tubig unya kusog sad ang tubig gikan sa bukid, mao ng naay tendency nga mo overflow and that resulted to flooding in different areas sa city,” niya pa .
Usa sa gitrabaho karon mao ang drainage project diha sa Parian Creek, sapa sa Tejero. Gibutyag sa konsehal nga duna na sila'y gikatakdang adlaw sulod karong semanaha sa pagkuha sa maong nagtipun-og nga waste materials.
Ang kontraktor sa proyekto nakakuha na og clearance ug hauling permit sa City Environment and Natural Resources Office (CENRO).
Si Guardo, nitug-an nga ang DPWH adunay gigahin nga P8 bilyones alang sa flood control sa Cebu City ug P1.2 bilyon pa lang ang nagamit sa siyudad.
Ang konsehal nitug-an nga dakong hagit ang ilang giatubang karon human uban mga edipisyo nga nagpatong mismo sa kilid sa mga sapa ang gikinahanglan nga bayaran sa kagamhanan una pa mahawan, kay kini titulado man. Giangkon niyang dili masayon-sayon ang pagsulbad sa baha sa dakbayan, apan gipangitaan kini og pamaagi.— Rowena Capistrano (BANAT NEWS)