Gunman migamit og “sumpa”pagpatay sa tanod

CEBU, Philippines —  Patay diha-diha ang usa ka barangay tanod sa Inuburan, sa Siyudad sa Naga human gipusil niadtong Domingo sa gabii samtang nagtan-aw og duwa nga dama diha sa ilang dapit. Ang gunman migamit pa og “sumpa” aron molampos sa iyang buhatong krimen.

Si Catalino Paunil, 62 anyos nga taga Purok Atis 3, Inoburan, Dakbayan sa Talisay nakaangkon og daghang pinusilan sa iyang kalawasan.

Sa inisyal nga imbestigasyon sa kapolisan nasuta nga nag duty si Paunil ug nakatunong nga iyang ig-agaw nagduwa og dama. Nihapit kini siya og tan-aw sa dama pero wa magdugay niabot ang duha ka wa ilhi nga mga lalaking sakay og motorsiklo.

Ang backrider gikatahong nanaog sa motor ug misablig og tubig ngadto sa yuta dayon walay daghang estorya gipauwanan og bala ang biktima. Si Police Staff Sergeant Ariel Yap sa Naga City Police nibutyag nga daw “sumpa” ang gibuhat sa mamumuno nga pagsablig og tubig. Subay sa kinaraang tinuohan, ang tubig gamito nga sumpa aron dili mopalyar ang armas nga pabuthon.

Gisubay sa kapolisan ang anggulo nga personal o ba kaha may kalabotan sa iyang trabaho isip barangay tanod ang motibo sa mga mamumuno pagpatay sa biktima.— IBM (BANATNEWS)