CEBU, Philippines — Gibuksan ni Talisay City mayor Gerald Anthony “Samsam” Gullas ang pagsaulog sa Nutrition Month karong buwan sa Hulyo pinaagi sa Nutri Fun Run ug zumba alang sa mga Talisaynon niadtong Sabado, Hulyo 1, 2023, sa Talisay City Hall.
Karong tuiga ang pagsaulog sa Nutrimonth kay nagtangag sa tema nga “Healthy diet gawing affordable for all”.
Ang programa gisugdan sa 3km Nutri Fun Run sa alas singko sa buntag sa Cebu South Coastal Road ug gisundan dayon kini og mubo nga programa ug Zumba exercise sa Talisay City Hall ground.
Ang maong kalihukan gitambungan nila ni Committee Chairman on Health Vice Mayor Choy Aznar, mga barangay health workers gikan sa tanang 22 ka mga barangay uban sa ilang tagsa-tagsa ka mga opisyales, mga estudyante sa Talisay City College ug uban pa. Si Gullas sa iyang pagpamulong miingon nga angay nilang dugangan ang ilang kahibalo sa kamahinungdanon sa himsog nga pagkaon ug aktibo nga estilo sa kinabuhi.
Saysay pa ni Gullas sa iyang Facebook post, ang pagbaton ug himsog nga estilo sa kinabuhi dili kinahanglan nga mahal. Ang pagkaon sa saktong pagkaon sa saktong oras ug pag-ehersisyo maoy pipila ka paagi kon unsaon pagkab-ot ang usa ka cost-effective nga himsog nga kinabuhi.
Aron mapalambo usab ang adlaw-adlaw nga pag-ehersisyo, ang dakbayan nagbutang og mga imprastraktura sama sa mga pasilidad sa sports.
Gipasalig sa mayor nga magpadayon siya sa paghimo og mga bag-ong programa ug paghimo og bag-ong pasilidad isip paagi sa pagpasiugda sa nutrisyon ug saktong ehersisyo. —CNU Intern/MEL (BANAT NEWS)