CEBU, Philippines — Mopahigayon og desilting o paghaw-as sa mga napundo nga lapok ug balas sa Buswang river ang lokal nga kagamhanan sa siyudad sa Toledo.
Si Toledo Mayor Marjorie Perales uban sa mga opisyal sa Toledo nakigtagbo ni gobernador Gwendolyn Garcia niadtong Hunyo 23, diin sila nitaho ngadto sa gobernador sa sitwasyon sa maong sapa didto sa Brgy. Cambang-ug.
Ang desilting usa ka proseso pagkuha sa lapok o pino nga balas ug ubang materyales nga anaa sa sapa. Kini aron malikayan ang risgo sa pagbaha ilabina nga nagsugod na ang ting-ulan.
Nakita sa gobernador nga kinahanglan kini ma aksyonan dayon hinungdan nga nimando si Garcia sa pagkuha sa maong mga lapok o materyales pinaagi sa tabang sa pribadong kontraktor nga RCV construction.
Sa taho sa Capitol Information Office, si Engr. Dennis Abella ang pangulo sa City Disaster Risk Reduction and Management Office (CDRRMO) sa Toledo niingon nga nimabaw na ang tubig sa maong sapa tungod sa mga nangagi nga bagyo sama sa bagyong Agaton niatong 2022 ug bagyong Odette niadtong 2021.
Tungod sa mga naanod nga balas, lapok ug uban pa nga napundo na sa sapa daku ang posibilidad nga mo-awas kini nga makaapekto sa mga residente ilabina sa mga nagpuyo duol sa sapa.
Si Garcia nagkanayon nga iyang monitoron ang sitwasyon sa maong sapa ug magpaabot sa dugang update gikan sa mga opisyal sa Toledo sa mosunod nga mga adlaw. (BANAT NEWS)