CEBU, Philippines — Pagahimoon karong adlawa, Enero 22, 2023 ang ground breaking ceremony sa Doña Pepang Heritage Park nga taod-taod na nga gidamgo sa Kagamhanan sa Siyudad sa Sugbo.
Sa nasayran nga usa kini ka sementeryo nga nahimutang diha sa Barangay Carreta og hingpit na nga i-convert ngadto sa heritage park.
Gibutyag sa usa sa mga assistant on special projects ni Mayor Michael Rama nga si Ramil Ayuman nga ang maong proyekto maghatag og dugang atraksyon dinhi sa Dakbayan.
Suma pa niya nga dunay sentimental value ang maong dapit ilabi na nga dinhi gipanglubong ang pipila ka mga kabanay sa Osmeña, Rama, Sotto, Briones ug uban pa.
Kahinumdoman nga dunay mga barong barong nga gitukod kaniadto diha sa Doña Pepang ug giingong gipundohan sa mga dautang elemento hinungdan nga gihawanan sa lokal nga kagamhanan.
Sa gihimong operasyon niadtong miaging tuig adunay nakuha nga mga drug paraphernalia diha sa maong lugar.
Ang pag-convert sa Doña Pepang o Osmeña Mausoleum ngadto sa heritage park kabahin kini sa plano sa Siyudad sa Sugbo nga masusama kini sa Singapore. (BANAT NEWS)