CEBU, Philippines — Duna na'y nisanong nga kompaniya nga mosuporta sa tinguha sa Kagamhanan sa Siyudad sa Sugbo alang sa pag-convert sa Doña Pepang Cemetery ngadto sa usa ka Heritage Park.
Usa sa nag-unang nisuporta mao ang negosyante nga si Lucio Lim Jr. nga tag iya sa Lite Ferries. Suma pa sa usa sa mga special assistant ni Mayor Michael Rama nga si Ramil Ayuman nga dunay na'y nahitabong tigum tali sa mayor ug ni Lim sa niaging adlaw.
Ang Lite Ferries building naa ra nahimutang duol sa Dona Pepang Cemetery.
Matud pa nga mapasalamaton si Lim sa plano ni Mayor Rama nga mahimong heritage park ang maong dapit.
Dugang pa ni Ayuman nga andam usab mosuporta sa maong proyekto mao ang Robinsons Galleria, SM City ug ubang mga negosyante nga naa palibot sa Doña Pepang.
Matud pa niya nga ang maong proyekto maghatag og dugang atraksyon dinhi sa dakbayan.
Suma pa niya nga dunay sentimental value ang maong dapit ilabi na nga dinhi gipanglubong ang pipila ka mga kabanay sa pamilyang Osmeña, Rama, Sotto, Briones ug uban pa.
Ang pag-convert sa Doña Pepang o Osmeña Mausoleum ngadto sa heritage park kabahin kini sa plano sa Siyudad sa Sugbo nga masusama kini sa Singapore. — MEL (BANATNEWS)