Atty. Castillo maoy mangu sa budget and finance sa siyudad

CEBU, Philippines —  Pipila pa lang gani ka buwan nga nilingkod si Atty.Jerone Castillo isip pangulo sa Cebu City Legal Office, gibalhin na usab siya ni Cebu City Mayor Michael Rama aron maoy mangulo sa budget and finance sa siyudad.

Wala pa gitino sa mayor kun kanus-a ang tataw nga adlaw sa pag-asumer ni Castillo sa iyang bag-ong posisyon.

Si Mayor Rama niingon nga usa sa unang tahas ni Castillo mao ang pagtan-aw sa kita sa South Road Properties.

Hinuon si Castillo tabangan usab sa ubang mga sinaligan ni Mayor Rama.

Si Castillo nahimo usab nga acting City Treasurer sa kagamhanan sa dakbayan sa Sugbo kaniadto.

Sa nasayran si Mayor Rama nipatuman og reshuffling sa mga department head ug ubang mga opisyal sa City Hall ug magpadayon kini hangtud nga makuha niya ang mga tawo nga mahaom sa gikuptan nga posisyon niini.

Pipila lang ka adlaw ang nilabay, gitunol usab ni Mayor Rama ang appointment letter ni Dr. Peter Mancao isip bag-ong officer-in-charge sa Cebu City Medical Center. Sanden J. Anadia ug Caecent No-ot Magsumbol/MEL

Feeding program maghatag ug panginabuhian sa mga inahan

Usa ka lapad nga feeding program nga maghatag usab og panginabuhian sa mga inahan ang ilusad ni Rep. Pablo John Garcia (Cebu, 3rd District) sa iyang adlawng natawhan karong Mayo 19.

Adunay kita ang mga inahan niini sanglit bayran sila sa pag-andam sa pagkaon nga ihatag sa ilang mga anak.

Ang mga benepisyaryo sa proyekto mao ang 1,534 ka mga bata nga nag-edad og 6 ngadto sa 12 anyos, ug 53 ka mga inahan sa lungsod sa Barili.

Ang asawa ni Kongresista Garcia nga si Karen F. Garcia maoy mangulo sa feeding project, nibutyag nga usa ka consultant sa nutrisyon ang nagbansay -bansay sa mga inahan sa Barili kon unsaon pag-andam og lamian apan masustansya nga pagkaon sa mga bata gikan sa mga sagol nga dali makit-an sa merkado.

“This is not only about nutrition and health care. This also involves transfer of knowledge through the training for recipes to be used by the mothers who will now have a livelihood because of this program. They prepare the food we buy the food from them. So malipay na ang mga bata sa lamin nga pagkaon, panginabuhi pa gyud siya sa mga Mama,” suma pa ni Karen.

Pakan-on ang mga bata og isda ug vege cakes, peanut butter ug oatmeal balls, chicken nuggets, monggo turon, ug pancakes.

“Ang pagpakaon dili lang aron mabusog ang mga bata. If sakto ang ilang nutrition, the children will also have bigger chances to improve their grades,” dugang pa niya.