Oceanjet ipaapil sa rota gikan sa Liloan paingon sa Camotes

CEBU, Philippines — Gitinguha sa Probinsiya sa Sugbo nga moapil ang Oceanjet sa pagbukas og rota niini gikan sa pantalan sa Lungsod sa Liloan padulong sa Isla sa Camotes.

Atol sa gipahigayon nga Suroy-Suroy Sugbo niadtong Abril 15 hangtud sa 16, 2023 ang Oceanjet maoy nagkarga sa dul-an 400 ka bisita sa maong tourism caravan gikan sa Pier 1 sa Dakbayan sa Sugbo padulong sa Camotes Island diin nilanat kini og duha ka oras.

Atol sa tigom, si Gobernador Gwendolyn Garcia uban sa mga opisyal sa Oceanjet gipangulohan ni Gene Lastimado, operations manager si Garcia nagkanayon nga positibo nga komento ang iyang nadawat gikan sa mga guest sa Suroy-Suroy kalabot sa Oceanjet.

Sa maong tigom sa niaging semana nahisgotan ang posibilidad nga mobukas ang Oceanjet og rota gikan sa Pier 88 sa Lungsod sa Liloan padulong sa Lungsod sa Poro sa Isla sa Camotes.

Si Lastimado nagkanayon nga iyang ipadangat ang tinguha sa gobernador ngadto sa ilang labaw ug mohimo sila og pakisusi sa viability sa Pier 88 sa Liloan ug mohimo og feasibility study.

Sayo pa, unang gikuha sa Kapitolyo ang Super Shuttle RORO aron magbukas og rota gikan sa maong pantalan padulong sa Isla sa Camotes apan nauswag ang paglusad niini. (BANAT NEWS)