CEBU, Philippines — Gisugyot ni konsehal Phillip Zafra, chairman sa Committee on Peace and Order sa Konseho sa Siyudad sa Sugbo nga palambuon ang Operation Second Chance.
Lakip sa gisugyot nga kalambuan mao ang pagpataas og maayo sa kural niini, ingon man pagbutang og daghang net.
Si Zafra kinsa mibisita sa pasilidad nagkanayon nga nakita niya nga dunay mga higdaanan ang nangadunot na, ug ang uban niini sa lamesa nalang nangatulog.
Matud pa sa konsehal nga pangitaan niya og pamaagi nga mahitabo ang kalamboan ug gusto niya nga mausab ang imahe sa pasilidad nga masusama na kini og balay.
“Unya, ato pud nga i-sure nga daghan gyud og programs ang mahitabo sa pasilidad. Kinahanglan nga sagunson gyud, aron dili intawn maburyong ang naa sa sulod niini. Example, kun mahuman na ang sports fest, sundan dayon kini og laing programs,” saysay pa ni Zafra dinhi sa Banat News. Dugang pa sa konsehal nga padugangan usab niya og mga CCTV camera ang palibot sa pasilidad.
Gipahibawo ni Zafra nga dunay nakalinya nga mga tigom sa nagkadaiyang stakeholders aron mahisgotan ang dugang pa nga mga concerns. (BANAT NEWS)