CEBU, Philippines — Dili momenus 55 ka mga pasyente nga adunay cleft ug lip palate kun bungi ang malampuson nga gioperahan ubos sa Operation Pahiyum niadtong Abril 12, 2023.
Si kongresista Pablo John Garcia sa tersero distrito nipadayag sa iyang pagpasalamat sa organizer sa Operation Pahiyum sa padayon nga tinguha niini pagpahigayon sa libre nga surgical operation alang sa mga bata ug hamtong nga adunay cleft ug lip palate.
“Tungod niining programa, bag-o nga kalibotan ang moabli kanila, sa kapin sa 50 nga nahatagan sa gasa sa pahiyum, mausab gyud ang ilang kalibotan, ug sila pud, makapausab sa atong kalibotan. Kay kining 55 ka pasyente, pwde nga adunay usa o duha nga mamahimong adunay dakong papel sa katilingban” matud ni Garcia.
Ang Operation Pahiyum 3.0 usa kini nga Cleft and Lip Palate Surgical Operation nga giorganisa sa Adavance Carnio-Facial Project Philippines Inc. (ACCPI) uban sa Budjong Foundation, uban sa doktor nga si Tess Heyrosa ug sa Probinsya sa Sugbo.
Niadtong Abril 13, nagkadaiyang volunteer nga nurse ug mga doktor ang gihatagan og pasidungog ug giila sa usa ka seremonya nga gihimo didto sa Balamban Provincial Hospital.
Ang libre nga operasyon nagsugod niadtong Agosto 1, 2022 sa siyudad sa Carcar dayon didto na pud sa siyudad sa Bogo niadtong Oktubre 2 sa niaging tuig ug niadtong Abril 3 ug Arbril 11, 15 gihimo sa lungsod sa Balamban. — MEL ( Banat News )