CEBU, Philippines — Subling magpalansang sa krus ang 63-anyos nga si Gilbert Bargayo sa Dakbayan sa Carcar diin ika-28 ka higayon na kini karong tuiga.
Matud ni Bargayo nga tungod sa COVID-19 pandemic napalta siya pagpalansang sulod sa tulo ka tuig.
Karong tuiga si Bargayo anha magpalasang sa krus sa Barangay Liboron, Dakbayan sa Carcar diin simple nga seremoniyas lang ang himuon.
Gbutyag ni Bargayo nga ilansang siya 30 minutos sa dili pa mag-alas 3:00 sa hapon karong Biyernes Santo.
Matud usab ni Bargayo nga daghan ang nabalaka karon sa iyang pagpalansang tungod sa iyang pangedaron apan iyaha kining panaad hinungdan nga buhaton niya kini. Si Bargayo nagkanayon nga nangandam na usab siya karon sa iyang panglawas apan kong ugaling unsa man ang iyang dangatan andam siya niini ug ihalad usab kini niya ngadto sa Ginoo.
Gipadayag ni Bargayo nga kutob lang siya sa 30 ka tuig sa iyang pagpalansang ug human niini magtutok nalang siya sa iyang pag-healing diha sa ilang lugar sa Siyudad sa Carcar.
Subay niini, human sa duha ka tuig nga pinaagi lang sa virtual ang pagpahigayon sa Siete Palabras tungod sa COVID-19 pandemic karong tuiga linawas na kini nga masaksihan karong Biyernes Santo diha sa Cebu Metropolitan Cathedral ubos sa tema nga "Gikan sa kilid ni Kristo nga Samaran, nahimugso ang simbahan".
Ang mga mamumulong sa pito ka pulong ni Hesus sa iyang paghingutas sa krus ang pasiunahan ni Most Reverend Midyphil Billones.
Ang una hangtud sa ikapitong pulong pagabatbaton ni Reverend Father Josephus Remonde; Monsignor Rogelio Fuentes; Reverend Father Eligio Suico; Monsignor Vicente Rey Penagunda; Reverend Father Marion Mejia; Monsignor Vicente Tupas, Jr.; ug Most Reverend Ruben Labajo.
Ang maong kalihokan taposon kini sa mensahe nga ihatag ni Cebu Archbishop Jose Palma.
Ang mga magtutuo mahimong mosaksi sa linawas o sa livestream sa The Cebu Metropolitan Cathedral o sa ilang mga radyo sa DyRF1215/Power 89.1. (BANAT NEWS)