CEBU, Philippines — Padayong nasinati ang pag-irog sa yuta sa usa ka bukirang barangay sa lungsod sa Barili nga nahimong hulga sa mga molupyo sa palibot niini tungod sa posibleng pagdahili sa yuta.
Sumala sa Provincial Disaster Risk Reduction and Management Office (PDRRMO) adunay pag-irog sa yuta sa pipila ka bahin sa Barangay Maigang sa maong lungsod.
Gibanabanang 32 ngadto sa 40 ka panimalay ang apektado kay nabutang sa peligro ang ilang mga pinuy-anan.
Una kining nasayran sa PDRRMO niadtong Enero 12 karong tuiga atol sa ilang pagsusi human nakadawat og report nga nangliko ang pipila ka bahin sa maong lugar. Gituohan nga ang sagunson nga pag-ulan nga nasinati sa unang mga adlaw bulan sa Enero karong tuiga ang hinungdan niini.
“It has been observed in this area that the water runoff coming from higher ground will going directly to concrete road (without drainage) and do not allow the water to soak to the ground which may cause many cumulative impacts to human and the environment including flooding, damage to public and private property eroded stream banks,” tipik sa assessment sa PDRRMO.
Girekomendar sa PDRRMO nga pabakwiton ang mga nagpuyo duol sa maong dapit ug kanunay nga magbantay hilabina sa gabii.
Sumala sa PDRRMO ang mga pamilya nibakwit ngadto sa mga silingan ug kabanay nga mas luwas ang nahimutangan apan dili layo sa ilang mga balay. (BANATNEWS)