CEBU, Philippines — Gipaniguro sa kagamhanan sa siyudad sa Sugbo ug sa Cebu2World Development Inc. nga mamintinar ang kalimpyo sa mga pagkaon nga gibaligya sa Carbon Market.
Subay niini gipasigarbo sa mga nagdumala sa Carbon Market nga nag-agi gyud og lapad nga training ang mga manindahay sa merkado.
Gani sa naiging adlaw, nagmalamposon ang laing hugna sa food handling training ngadto sa Carbon vendors nga nilungtad og duha ka adlaw.
Ang Cebu2World Development, Inc., Cebu Chamber of Commerce and Industry (CCCI), ug kagamhanan sa dakbayan sa Sugbo pinaagi sa Office of the City Markets OCM maoy nag-organisar sa duha ka adlaw nga training.
Tumong niini nga madugangan ang kahibawo sa dul-an sa 100 ka vendors ug stall owners sa saktong pagdumala sa mga produkto sa pagkaon aron masiguro ang sanitasyon ug mas maayong pag serbisyo sa mangomprahay diha sa merkado.
Ang mga partisipante niini naggikan sa “wet” ug “carenderia” sections sa Carbon Public Market.
Ang namulong sa seminar nga si Josie Elli kinsa nagikan kaniadto sa Department of Science and Technology DOST nipadayag nga importante kayo ang pagsiguro nga ang matag produkto susihon una sa dili pa ibaligya, maampingon nga giandam ug kanunay nga gibantayan. Siya miingon nga ang kaluwasan sa pagkaon mao ang pag atiman sa kahimsog sa mga konsumedor.
Una na nga gipaniguro sa kagamhanan ang kalimpyo sa merkado nga magsibling instrumento sa pag-agni ug daghang mangomprahay.
Nasayran nga naghatag kini og lapad nga kahigayon sa mga vendors nga makapamaligya sa ilang mga pagkaon, produkto, delicacies ug uban pa.
Nahimutang ang mga stalls niini diha sa Quezon Boulevard sa Carbon Area.
Masaligon ang kagamhanan sa siyudad nga mas modaghan pa og samot ang mga tawo nga motikang sa merkado sa Carbon og dako kini og matabang ngadto sa mga vendors. /MEL (BANAT NEWS)