CEBU, Philippines — Niapelar ang Environmental Management Bureau (EMB) sa Department of Environment and Natural Resources - Central Visayas ngadto sa katawhan nga sa bisan unsa nga okasyon o dagkong kalihokan, kinahanglan nga imintinar ang maayong kalidad sa hangin.
Gani sa pagsugat sa Pasko ug Bag-ong Tuig, gidasig nila ang katawhan nga mangita og laing pamaagi sa pagsaba-saba nga ihulip sa naandan nga mga pabuto.
Atol sa news forum sa MyTV nga Open Line , si Engr. Cindylyn Pepito-Ochea, hepe sa Environmental Education and Information Unit sa EMB-7 nihangyo sa publiko nga mangita og laing pamaagi , sama sa pagamit og “bubbles toys ” o ba kaha mga “torotot” sa pagsugat sa Pasko ug Bag-ong Tuig sanglit luwas kini gamiton o layo sa disgrasya.
Matud pa dunay substance sa mga pabuto ang makaapekto sa kalidad sa hangin.
Sa nangaging katuigan sukad niadtong 2020 diin napatuman ang mga restriksyon tungod sa pandemya, giingong dunay kalamboan sa kalidad sa hangin.
Karon nga nilugak na ang mga restriksyon, labing maayo nga ipadayon sa katawhan ang paggamit sa mga alternatibong pamaagi.
Nasayran nga nag-unang tinubdan sa polusyon mao ang aso nga gibuga sa mga sakyanan.
Padayon nga i-monitor sa EMB-7 ang istado sa kalidad sa hangin sa gabii atol sa pagsugat sa Pasko ug Bag-ong Tuig. —MEL (BANAT NEWS)