CEBU, Philippines — Namaligya og bayong ug bag ang mga Persons Deprived of Librety (PDL) sa Talisay City Jail.
Si Jail Insp. Roselle Paracale, warden sa female dormitory nagkanayon nga ang mga PDL ang nag gama sa mga bayong ug bag nga adunay nagkalain-laing desinyo.
Gani isip pagpromote sa ilang bayong ug mga bag naghimo sila og programa nga gitawag og Runway, Bayong-Bags 2022 collection.
Ang nahimong modelo mao rasab ang mga PDL nga naghimo sa ilang produkto.
Lakip sa programa mao ang mga LGBTQ plus nga nipakita sab sa ilang abilidad diha sa runway nga ilang gipahigayon.
Matud pa ni Paracale nga gihimo nila ang programa aron mopalambo ang social ingon man welfare sa mga PDL.
Nalipay ang mga PDL tungod kay nisaka ang ilang moral ug nalingaw sila bisan paman og naa sila sulod sa prisohan.
Ang mga bayong ug bags nga gibaligya nagkantidad og P250 ngadto sa P650 ka pesos matag usa depende sa desinyo. Gani nakabaligya na sila og 50 kabuok ug ang halin ilang mabahin-bahin ug mahimo sila nga makapadala og salapi sa ilang pamilya nga naa sa gawas. (BANATNEWS)