Konseho sa Cebu City pabor sa paggamit og electric vehicles

CEBU, Philippines — Niisyu og endorsement ang konseho sa Siyudad sa Sugbo pinaagi sa Committee on Budget and Finance alang sa paggamit sa electric vehicles sa dakbayan isip sustainable nga paagi sa transportasyon.

Giaprobahan sa konseho ang maong committee report nga gipatrabaho kang Konsehal Noel Wenceslao, chairman sa Committee on Budget and Finance.

Sayo pa, si Konsehal Nestor Archival, Sr. nihangyo sa maong komitiba nga mohimo og pagtuon sa posibilidad nga pagpalit og electric vehicles nga gamiton sa kagamhanan sa dakbayan.

Kini human ang mga komitiba sa transportasyon ug kalikupan sa konseho pabor sa paggamit sa e-vehicles sa dakbayan.

Nunot niini, ang International Trade Administration (ITA) nagkanayon nga ang Pilipinas nagpadayon sa pagpalambo sa ilang electric vehicle market samtang ang industriya ug gobiyerno nagtinabangay sa pagsuporta sa maong pagsagop sa Pilipinas.

Gikan sa panan-aw sa sektor sa enerhiya, ang gisugyot nga legislation nagtinguha nga magtukod og usa ka tibuok nga eco-system sa pagsuporta sa mga e-vehicles pinaagi sa pag-require sa Philippine Department of Energy (DOE) sa paghimo og Electric Vehicle Roadmap nga mahimong kabahin sa Philippine Energy Plan. .

Ang komitiba nagkanayon nga si kanhi energy secretary Alfonso Cusi nipadayag nga ang departamento nagpadayon sa pag-deploy sa 20,000 ka imported nga electric vehicles ug pagbutang og 5,000 EV charging stations sa mosunod nga lima ka tuig.

Diin gipanglantawan nga makapakunhod kini sa paggamit sa gasolina ug kapin sa 145 milyones ka litro o P8 bilyones nga kantidad sa gasolina.

Malaumon ang Electric Vehicle Association of the Philippines (EVAP) nga ang pag-isyu sa guidelines ug polisiya sa charging infrastructure sa DOE makatabang sa pagdasig sa mga negosyo sa pagbutang ug pagsagop sa EV charging stations pinaagi sa paghatag og fiscal incentives.

Gipadayag sa komitiba nga ang pagpalit sa mga dekuryenteng sakyanan makatabang sa pagpakunhod sa polusyon sa hangin.

Si Archival maoy nisugyot nga sugdan na sa kagamhanan sa dakbayan ang paggamit sa mga electric vehicle aron makadaginot. — (/BDB) (BANAT NEWS)