CEBU, Philippines — Ang pag-umol og ubay- ubay nga composting areas ug ang pag-set-up og Material Recovery Facilities (MRF) sa matag clustered barangays maoy usa sa gihisgotan sa pakigtigom ni Konsehal Phillip Zafra sa ubang sa mga sakop sa Solid Waste Management Board sa niaging adlaw.
Gibutyag ni Zafra nga nasabotan usab sa tigom mao ang paghingusog sa Solid Waste Management Council.
Nitambong sa maong tigom ang mga kapitan, barangay konsehal , Konsehal Francis Esparis, Konsehal Donaldo Hontiveros , pangulo sa Department of Public Services Atty. Diego Dacua, Cebu Environmental Sanitation and Enforcement Team (CESET) head Merculio Luardo Grace ug uban pa.
Giingong pinaagi sa composting areas mapahimoslan pa ang mahimong produkto niini ug makatabang sa pagmenos sa nagtipun-ok nga basura.
Giawhag karon sa kagamhanan ang katawhan nga kinahanglan g dili magpataka og labay sa ilang mga basura.
Nasayran nga gihimo sa kagamhanan sa Siyudad sa Sugbo ang lapad nga pagpatuman sa City Ordinance 1361o ang hustong paghinlo sa mga basura.
Gihangyo usab ang katawhan nga kinahanglan nga ibutang gyud ang basura sa gitagana nga mga sudlanan niini.
Nasayran usab nga kasagaran sa mga basura nga nahipos sa siyudad mga plastic diin mao kini ang kasagaran nga mo ungot sa mga kanal hinungdan sa baha panahon sa kusog nga uwan.
Dugang hangyo CESET nga mosubay ug huwaton ang schedule sa koleksiyon sa basura sa ilang dapit. BDB (BANATNEWS)