VECO nipasalig nga andam kanunay bisan sa kalamidad

CEBU, Philippines — Gipasalig sa Visayan Electric nga andam sila kanunay ilabi na kon adunay mga kalamidad sama sa bagyo.

Matud ni Engineer Raul Lucero, presidente/COO sa maong kompaniya nga nahan-ay na ang ilang mga contingency plan tungod kay dili masiguro o mahibaw-an sanglit ang dagan sa panahon.

Atol sa Power Lunch kagahapon gibutyag ni Lucero ang paspas nga pagresponde sa Visayan Electric alang sa ilang mga kustomer nga nakabaton og problema sa koneksiyon sa ilang kuryente diin walay gipili nga oras ang pagtubag sa mga nanginahanglan  sa ilang serbisyo. Sa iyang bahin, si Engineer Mark Anthony Kindica, assistant vice president  for engineering operations sa Visayan Electric nibutyag  nga anam-anamon nila pagmontar  ang bag-ong desinyo sa ilang mga poste nga makasugakod og kusog nga hangin.

Apan giangkon ni Kindica nga dili ingon niini kadali ang pagbutang  sa maong mga poste tungod sa kadako sa ilang coverage apan ang labing importante nga maanam-anam ang pag-umol niini.

Matud ni Kindica nga dili na basta-basta ang gikusgon sa hangin sa higayon nga adunay bagyo sama sa nahitabo sa bagyong Odette nga niigo sa Sugbo sa niaging tuig.

Nagpadayon usab karon ang ilang clearing sa mga nangagoubat nga wire.  

Ang Visayan Electric Power Lunch 2022 kabahin kini sa mga programa sa kasaulogan sa 2022 Press Freedom Week.

Nasayran nga pipila na ka tuig nga nisuportar ang Visayan Electric sa pipila ka mga programa sa maong tinuig nga kalihokan. (BANATNEWS)