Usa patay, duha angol sa bangga sa motorsiklo

CEBU, Philippines — Patay ang usa ka 45-anyos nga lalaki ug duha ang naangol human sa bangga sa duha ka motorsiklo nga ilang gisakyan diha sa Barangay Talaga, Lungsod sa Argao niadtong Lunes sa gabii.

Si Police Staff Sergeant George Tapales niila sa namatay nga mao si Marlit Aballe Cañete, residente sa Barangay Guadalupe, Dakbayan sa Sugbo. Gikataho nga nakaangkon kini og grabeng kadaot sa ulo human sa pagkabunal niini diha sa karsada gumikan kay natangtang ang helmet nga iyang gisul-ob tungod sa ka kusog sa impact.

Samtang ang duha ka naangol mao sila Joshua Allego, 32, ulitawo kinsa nagmaneho sa ikaduhang motorsiklo ug iyang ig-agaw nga angkas nga si Cloudy Allego, 17-anyos, mga residente sa Barangay Cansuje, Lungsod sa Argao. Base sa imbestigasyon sa kapolisan nga si Cañete nagbiyahe paingon sa habagatan samtang ang duha ka naangol nagbiyahe paingon sa amihanan kinsa si Joshua gituohang hubog ug ni-counter flow kini sa habig sa lane nga gisubay ni Cañete hinungdan nga nagkabangga ang ilang mga motorsiklo nga gisakyan.

Ang tulo gidala diha sa Isidro C. Kintanar Memorial Hospital sa Lungsod sa Argao kinsa si Allego gideklara sa mga doktor nga patay na nga naabot sa maong tambalanan.

Si Joshua nakaangkon og bun-og sa lawas samtang si Cloudy gidala diha sa Vicente Sotto Memorial Medical Center sa Dakbayan sa Sugbo tungod kay nabunal usab ang ulo niini diha sa karsada.

Giingong ang nahisgutang manag-agaw wala kini sul-ob nga helmet. Sa laing bahin, nisaka ang gidaghanon sa traffic violators sa Siyudad sa Sugbo  alang sa buwan sa Hulyo kompara niadtong Mayo niining tuiga .

Ang Cebu City Transportation Office nakaisyu og 8,577 ka citation tickets niadtong Hulyo kompara sa natala nga 6,485 ka violators niadtong Hunyo. Kasagaran sa mga nadakpan mao ang mga walay rehistro, expired ang mga lisensiya ug pagbaliwala sa traffic signages. Mary Rose A. Carciller, UV Intern ug Sanden J. Anadia/BDB (BANATNEWS)