CEBU, Philippines — Miabot sa usa ka gatus ka fire extinguisher ang gihatag sa kabomberohan sa Dakbayan sa Talisay sa mga residenti sa barangay Lawaan 3 niadtong Biyernes sa hapon.
Si Fire Marshal Atty. Alvin Torion nibutyag nga sila nakahuna-huna sa paagi nga makahatag og tabang sa mga konstitwenti nga mapugngan ang sunog.
Matud pa ni Torion nga gamay nga paagi kini apan dako og epekto tungod kay ang dagko nga sunog anha man magsugod sa gamay.
Ang iyang buhatan nakig alayon sa Alpha Kappa Rho (AKRHO) fraternity aron matuman ang kalihukan ug sila nagtampo-tampo aron makapalit sa mga fire extinguisher.
Ila sab giuna ang barangay Lawaan 3 tungod kay mao kini nga barangay nga fire prone area.
Base sa ilang talaan ang maong barangay ang adunay pinakadaghan nga nahitabo nga sunog.
Si konsehal Danny Caballero, chairman sa committee on Disaster Resilience nibutyag nga iyang gipasidunggan ang kabomberohan sa matang sa inisyatibo.
Suma pa ni Caballero nga ilang gihatag ang maong kahimanan ngadto sa matag sitio ug sila gitudloan sa pag gamit niini aron ang gamay nga kayo mapugngan nga kini modako. MEL (BANATNEWS)