CCPO nipasiugda og Coastal cleanup

CEBU, Philippines — Ang Cebu City Police Office (CCPO) nipahigayon sa ilang unang Cebu City Legacy Grand Caravan ug coastal clean-up drive diha sa ILCorso Lifemalls sa South Road Properties (SRP), dakbayan sa Sugbo kagahapon sa buntag.

Si Police Colonel Ernesto Salvador Tejada Tagle, acting city director sa CCPO nagkanayon nga ang maong kalihokan usa ka panagtapok sa mga pribado ug publikong ahensiya alang sa kaayohan sa siyudad ug sa kinatibuk-an.

Sa gipahigayong caravan, ang mga nagkadaiyang ahensiya nagtanyag og libreng serbisyo sa publiko nga nagsugod sa alas 8:00 sa buntag ug gidagsa kini sa katawhan.

Pipila sa mga serbisyo mao ang issuance sa birth certificate ug national identification (ID) sa Philippine Statistics Authority (PSA)-7, local ug national registration sa Comelec, issuance of national police clearance sa CCPO, free legal services sa Public Attorney’s Office (PAO), PNP recruitment, job fair sa Department of Labor and Employment (DOLE), free dental service sa Philippine Coast Guard (PCG)-7, Maritime and Environmental Protection sa Department of Environment and Natural Resources (DENR)7, ug uban pa.

Samtang si Lieutenant Colonel Janette Rafter, deputy director for operations sa CCPO nibutyag nga 1,500 ka personnel gikan sa nagkadaiyang law enforcement agencies sa Sugbo ang nisalmot sa kalihokan nga kabahin sa tibuok buwan nga kasaulogan sa Police Community Relations (PCR).

Gawas sa coastal clean-up, adunay Scubasurero diin 40 ngadto sa 50 ka divers ang niapil lakip na ang United Continental Eagles Club (UCEC), Philippine Navy, Bureau of Jail Management and Penology (BJMP), ug Philippine Coast Guard diin ilang gikuha ang mga basura ilawom sa dagat. — (CNU Intern ug Mary Rose A. Carciller, UV Intern/BDB) (BANAT NEWS)