CEBU, Philippines — Nadismaya ang bag-ong milingkod nga mayor sa Lungsod sa Cordova nga si Mayor Cesar Suan sa iyang pagasumir sa munisipyo kagahapon human nga wala kini naabtang mga gamit sa lungsod diha sa munisipyo.
Matud pa ni Suan, nga niadtong adlaw nga Miyerkules naa pa ang lamesa sa buhatan sa mayor atol sa ilang pagpinirmahay para sa transition.
Apan dako na iyang kahikurat human sa iyang pagbalik kagahapon sa pagbalik niya og duaw nangawala na ang mga kagamitan sa munisipyo sama sa mga lingkuranan ug lamesa.
Dugang pa ni Suan, tanan mga kagamitan nga iya sa lungsod ilang ipaubos sa imbentaryo human daghan sa mga butang ilang gipangita nga wala na igkita.
Apil niini ang mga bangko nga pahulman kung adunay mga namatyan lakip usab kung adunay mga aktibidades sa kabarangayan wala na nila igkita.
Sumala pa ni Suan, wala siya magdahum nga mao kadto ang iyang maabtan sa buhatan sa mayor tungod nagtuo siya nga iya sa lungsod ang mga gamit diha sa sud. —Romeo Limpangog/IBM (BANATNEWS)