Socialized housing sa informal settlers giturn over na

CEBU, Philippines — Pormal na nga giturn-over ug gisubhan kagahapon,Hunyo 29,2022  ang duha ka medium rise buildings ngadto sa Kagamhanan sa Siyudad sa Sugbo.

Ang maong estruktura nahimutang sa Barangay Lorega San Miguel nga himoong socialized housing nga puy-an sa mga informal settlers.

Nasayran nga ang Cebu Landmasters, Inc. (CLI) maoy nidonar sa maong mga building nga gigastohan og P115 milyones.

Nitambong sa seremonyas kagahapon ang kadagkoan sa CLI ingon man usab sila si Mayor Michael Rama, Bise Mayor Raymond Garcia ug mga opisyales sa barangay Lorega.

Suma pa ni Rama nga dugay na niya nga pangandoy nga makatukod og desente nga pinuy-anan alang sa mga kabos.

Ang maong proyekto gitawag og "Walk-Up Sugbo 1" nga gilangkoban og 100 units nga nahimutang sa 1,350 sqm property.

Gatosan ka pamilya nga nagpuyo sa "danger areas" sa dakbayan ug 60% niini taga barangay Lorega maoy gikatakdang moistar sa maong buildings.

Hinoun padayon pa nga giproseso ang listahan alang sa mahimong benepisaryo niini.

Ang matag unit dunay floor area nga 25 sqm. ug duna kini  saktong bentilasyon.

Matud pa nga mao kini ang labing lapad nga  socialized housing development  sa VisMin nga dunay  ground floor chapel, retail spaces , parking ug livelihood training ug Multi-Purpose Hall nga idonar sa  Cebu Landmasters Foundation.

Duna usab kini "PWD-friendly ramps" hangtod na gyud sa ikalima o katapusang andana niini.

Nagtangag pud kini og solar panels nga maghatag og elektrisidad sa common areas ingon man usab sa pag-pump sa tubig.

Butangan usab kini og sewage treatment plant aron maseguro ang pagtuman sa solid waste management.

Si kapitan Fritz Herrera sa Barangay Lorega, mapasalamaton sa gihimong Ceremonial Turn-over sa Walk-up Sugbo.

Matud pa ni Herrera, adunay tulo ka sub groups nga gitutukan aron makapuyo sa maong condo unit, kini naglakip sa naa sa danger zone areas, nag-atubang ug court evection ug kadtong maigo sa proyekto sa gobiyerno.

Gibutyag ni Herrera, base sa kanhi nila verbal agreement adunay 60 porsyento para sa taga Lorega ug 40 percent para sa ubang mga lugar sa dakbayan tungod kay daghan man usab karon nagkinahanglan ug panimalay.

Suma pa sa kapitan nga daku kaayo og tabang ang maong proyekto ilabi na sa mga taga Lorega kay naa ra sa duol ang ilang relocation tungod kay kasagaran sa mga relocation site nahimutang man sa kabukiran. —Rowena D. Capistrano/MEL (BANATNEWS)