Zafra nagtinguha nga mapatuman ang ID ordinance

CEBU, Philippines — Gibutyag ni Konsehal Phillip Zafra nga usa sa hatagan niya og pagtagad sa dugang hugna sa iyang termino pagka-konsehal mao ang implementasyon sa gipasar niya nga mga ordinansa diin usa na niini mao ang Cebu City ID ordinance.

Tumong sa maong ordinansa nga ma-simplify ug mapaspasan ang pagpadangat sa nag-unang serbisyo ngadto sa katawhan sama sa social ug health care sa CHAMP (City Hospitalization Assistance and Medicines Program).

“Simbako masakit ta, ma admit ta sa ospital gusto ta mo-avail sa CHAMP, dili na kinahanglan mokuha pa ka og clearance, voter’s certificate. Ang imong Cebu City ID nalang maka-avail na ka sa CHAMP,” matud pa sa konsehal.

Matud pa niya nga dili na mahasol ang katawhan sa nagbaha nga requirements sa pipila ka mga transaksyon.

Target usab ni Zafra alang sa Cebu City ID nga makig-alayon sa Landbank aron mahimo na usab kining gamiton sa mga PWD ug senior citizen sa ilang pagkuha sa ilang financial assistance.

Lakip usab sa ordinansa nga gipalabang sa konsehal mao ang pag-establisar sa Botika sa Barangay.

“Nanghinaot ko nga si Mayor Mike Rama i-implement sad na karon bisan magbutang lang ta og pilot barangays, lima ka buok diri sa patag, duha ka buok sa bukid,” suma pa ni Zafra.

Ang katuyoan niini nga dunay madangpan ang katawhan aron makabaton og mga libreng tambal.

Gitataw sa konsehal nga kun matambalan dayon ang mga sakit, dili na mograbe ang kondisyon sa pasyente busa dako gyud og matabang ang botika sa Barangay.

Gihikay na ni Zafra ang angayan nga mga proseso alang sa hingpit nga implementasyon sa giumol niya nga mga ordinansa. MEL (BANATNEWS)