CEBU, Philippines — Gibutyag ni Konsehal Raymond Garcia nga gipangitaan karon og paagi ang paghaom sa appraisal value sa luna nga naapil sa 93-1 tali sa Sa Probinsiya sa Sugbo ug Siyudad sa Sugbo.
Matud ni Garcia nga nigawas na ang appraisal value ug ilaha na kining gihaom alang sa duha ka habig.
Adunay ubang area sa luna sa probinsiya nga giingong commercial lot sama sa pipila ka bahin diha sa Barrio Luz.
Nagkanayon si Garcia nga usa kini sa gihangyo nila sa probinsya alang sa paghatag og konsiderasyon sa maong area tungod kay mga balay ra gihapon ang natukod niiini.
Matud usab ni Garcia nga gibuhat sa siyudad ang paghatag og kasulbaran sa 93-1. Sayo pa, ang kagamhanan sa siyudad nipahigayon og re-assessment alang sa beneficiaries sa 93-1 aron makaumol og Implementing Rules and Regulations.
Niining ulahi lang, gibutyag ni Atty. Collin Rosell, legal consultant ni Mayor Michael Rama nga usa ang IRR sa magsilbing pamaagi sa kasulbaran sa mga suliran sa beneficiaries nga wala pa hingpit nga maangkon ang luna nga ilang giestaran.
Base sa nadawat niya nga report nga sa 5,000 ka homeowners adunay kapin sa 3,500 niini ang wala pa makompleto sa ilang obligasyon kaniadto.
Nasayran nga adunay kapin sa 5,000 ka homeowners gikan sa 11 ka barangay ang nalakip sa 93-1 land swap deal sa Siyudad sa Sugbo ug Probinsya sa Sugbo. BDB (BANATNEWS)