Mga indigent libre sa Toledo City General Hospital

CEBU, Philippines — Gipahibalo sa kagamhanan sa Dakbayan sa Toledo nga walay bayranan ang mga indigent nga ma-admit sa Toledo City General Hospital.

Base sa advisory sa siyudad nga ang maong programa gitawag og “No Balance Billing” ug gitagana kini alang sa mga nalakip sa Pantawid , 4Ps, ug UCT  nga mga residente sa Dakbayan sa Toledo.

Giingong sa higayon nga ma-admit sa maong tambalanan kinahanglan nga sultihan  ang nurse o doktor nga maoy nag-atiman sa pasyente nga nalakip kini sa sektor sa mga indigent.

Atol sa pag-discharge sa pasyente moadto lang sa billing section  alang sa pagkuha sa assessment  ug ipakita  ang ID sa Pantawid , 4Ps  o UCT ngadto sa social workers nga nadestino sa tambalanan aron maka-avail sa “No Balance Billing” project.

Alang sa dili mga miyembro sa maong grupo mahimo ra nga mo presentar og barangay indigency certificate ngadto social walker alang sa validation. (Sanden J. Anadia/BDB)

Lalaki patay human nabangga sa poste ang gimaneho nga motorsiklo

Patay ang 24-anyos nga lalaki kinsa nagmaneho sa iyang motorsiklo human kini aksidente nga nibangga diha sa poste sa Barangay Santa Cruz, Lungsod sa Balamba kagahapon sa buntag.

Ang nakalas giila nga si Benjamin Agua, ulitawo, taga Barangay Cabasiangan sa maong lungsod.

Matud ni Police Staff Sergeant Monchito Clarin, desk officer sa Balamban Police Station nga nakadawat sila og tawag gikan sa maguwang nga polis sa biktima kalabot sa nahisgotang insidente.

Base sa imbestigasyon sa mga niresponding polis nga si Agua sakay sa motor niini nagbiyahe gikan sa sidlakan nga bahin padulong na unta kini nga mouli apan pag-abot sa maong lugar wala nakontrol niini ang gidala niyang motor hinungdan nga nilahos kini ug nibangga sa poste.

Ug gumikan sa maong pagkabangga nalabay si Agua diha sa kasagbutan ug nakaangkon og grabeng kadaot sa lawas.

Ang biktima dali nga gidala sa iyang igsuon ug paryente sa tambalanan apan gideklarar kini sa doktora nga patay na nga naabot sa tambalanan.  Sa laing bahin, duha ka molupyo sa Barangay Polog, Lungsod sa Consolacion ang naangol human ang ilang panimalay kalit nga naigo sa 10 wheeler truck nga nagkarga og bas.

Si Police Staff Sergeant Roel Aquino sa Consolacion Police Station niila sa mga biktima nga sila si Johan ug Joseoh Gasal, pulos hingkod ang panuigon nga nagpuyo sa maong dapit.

Ang maong truck gimaneho kini ni Franklyn Salonga, 34, residente usab sa maong lugar kinsa naangol usab sa maong hitabo.

Si Aquino nagkanayon nga nag-mal-function ang makina sa truck hinungdan nga wala kini makontrolar ni Salonga. Romeo T. Limpangog/BDB (BANATNEWS)