Cebu City hinog na para sa alert level 1

CEBU, Philippines — Nagkanayon si Cebu City Councilor Joel Garganera, pangulo sa Emergency Operations Center Cebu City naa nalang sa 165 ang active cases sa COVID-19 sa siyudad mao nga sa iyang tan-aw hinog na ang Sugbu aron pakunhoran ang alert level classification niini.

Matud niya sobra na usa ka semana nga ubos kaayo sa 5 percent nga positivity rate threshold sa World Health Organization ang siyudad.

Base data sa EOC Cebu City sa 80 ka barangay sa Cebu City ang 33 niini nga duna pay mga kaso wala nay reported transmission sa milabay nga 14 ka adlaw.

Samtang ang pagpamakuna kontra COVID-19 sa siyudad giadto na sa mga kabarangayan ug sila mismo sa EOC mitabang sab sa pagpamakuna.

Nagtuo si Garganera nga angayan nang ma-downgrade gikan sa alert level 2 ngadto na sa alert level 1 ang siyudad. “The best thing to do is to prepare when the time come, ilabi na atong Mayor nideklarar na pud sa Oplan Kagawasan so wala nagpasabot nga si COVID wala so we have to do is to be mindful gihapon. Let us not to be complacent, mindful gihapon unya akong gibalik pagtawag nga pabakuna gyud,” matud ni Garganera.

Giangkon ni Garganera nga sukad gipatuman ang Executive Order No. 163 o Oplan Kagawasan sa Cebu  City nakadawat siya og report nga dunay mga establisemento ilabi na mga imnanan nga nagpunsisok gyud ang mga tawo.

Subli niyang gipahinumdoman ang mga establisamento nga kun alfresco ang ilang lugar 70 percent ang gitugot nga capacity, samtang kadtong mga enclosed kinahanglan gyud dunay hustong kahungawan sa hangin.  Sa pikas bahin, sa Talisay City 22 na lamang ang aktibong kaso sa Covid-19 sa maong dakbayan base sa talaan sa City Health Office niadtong Marso 8 ning tuiga.

Ang siyudad dunay kinatibuk-ang natalang kaso nga 6,578 ka kaso ug 6,188 na ang ang nakarekober sukad nagsugod ang pandemiya.

Sa 22 ka barangay niini 10 ang wala nay natalang kaso.

Si Mayor Gerald Anthony “Samsam” Gullas nipahibawo nga gawas sa naandang mga vaccination sites nag- eskedyul sab sila og offsite vaccinations sa Poblacin, Dumlog, Tanke, Lagtang, Jaclupan, Candulawan, Tapul, Maghaway, Pooc ug Lawaan 3.

Alang sa nag edad og 5 ngadto sa 11 anyos naa ang Talisay City College naghuwat sa pagbakuna. —Gabriel Bonjoc/IBM (BANATNEWS)