CEBU, Philippines — Giawhag karon ni Archbishop Jose Palma, sa Archdiocese of Cebu ang kadagkuan sa Catholic Bishops Conference of the Philippines nga mopagawas og dugang pastoral letters nga mogiya sa katawhan sa umaabot nga eleksyon karong Mayo 9, 2022.
Kini ang pamahayag sa Arsobispo human miani og lain-laing reaksyon gikan sa katawhan ang CBCP Pastoral Letter niadtong Pebrero 25, 2022 nga nag-ulohan The truth will set you free.
Misugyot si Palma nga dugangan pa ang mga pastoral letters aron giyahan ang mga tawo sa ilang pagpili.
Lakip sa gustong malakip ni Palma mao ang pagpangita sa katawhan og tubag gikan sa mga kandidato kabahin sa kun unsa ilang mga plano bahin sa isyu sa poverty, education, ekonomiya, foreign policy, unemployment ug uban pa.
Dugang pa ni Palma nga pinaagi niini magiyahan sa ilang pagpili kun angayan bang botaran ang usa ka kandidato. (BANAT NEWS)