CEBU, Philippines — Gipahibawo ni Cebu City Mayor Michael Rama nga sa Pebrero 19, 2022 o karong Sabado ablihan na og balik sa publiko ang Cebu City Sports Center diin mahimo na unyang maka-exercise ang mga tawo.
Sayo pa, gisirad-an sa publiko ang maong sports facility tungod kay gihimo kining isolation facility apan dihang nikunhod ang kaso sa COVID-19 sa siyudad plano na unta sa Cebu City Government nga ablihan na kini og balik sa publiko sa niaging tuig.
Apan nalangay na usab ang pag-abli niini tungod sa bagyong Odette ug ang Cebu City Sports Center ilabi na ang atop sa grandstand ang naguba human sa pagkuso-kuso sa bagyo.
Gihinay-hinay na og ayo sa kagamhanan sa siyudad ang maong pasilidad ug sa nahisgutang adlaw buksan na kini og balik sa publiko.
Matud ni Rama nga aduna nay budget alang sa pag-ayo sa Cebu City Sports Center apan wala una gibutyag sa mayor ang kantidad sa budget nga giandam sa siyudad alang sa maog katuyoan.
“I was talking to the sports managers and the commission they will do a fast track”, dugang ni Rama. —BDB (BANATNEWS)