CEBU, Philippines — Giklaro Konsehal Phillip Zafra nga personal niya nga kwarta lakip nila ni Bise Mayor Donaldo Hontiveros ug Konsehal Eduardo Rama ang gigamit sa pagpamalit og suga nga gipangtaod sa mga poste nga usa sa ilang gi-busy-han karong panahona.
Mao kini ang tubag ni Zafra ngadto sa gihulagway niya nga mga “political marites” nga giingong nangintriga sa mga suga nga adunay marka sa ilang mga pangalan.
Sa Facebook post ni Zafra gitataw niini nga adunay trolls ang sige’g pamira kanila ug gikatan-aw lang niya kini.
Matud ni Zafra nga nagsugod na og samok-samok kaniya ang iyang mga kritiko nga mga “political marites”.
Ang termino nga “marites” usa sa uso karon nga pulong nga naghulagway sa mga tawo nga kusog kaayo mag-umol og intriga.
“Dili gyud unta ko ganahan nga tubayan pa ni apan daghan ang nangutana nako kabahin niini mao nga atoa lang klarohon mga igsuon!”, matud ni Zafra.
Sayo pa, gilusad nila ni Zafra, Rama ug Hontiveros ang task force nga motabang sa pag-ilis og bombilya alang sa mga poste nga wala na nagsiga.
Nasayran nga ubay-ubay ka mga poste sa suga ang nangaguba ug mga bombilya ang naponder human sa bagyong Odette. /BDB (BANATNEWS)