Cebu City gipasidunggan sa pakigbatok sa COVID-19
MANILA, Philippines — Si Cebu City Mayor Michael Rama nalipay ug nagpasalamat nga ang tanang tawo nagkahiusa hinungdan nga ang Cebu City nakadawat og mga pasidungog.
Sama sa Cebu City Emergency Operations Center nga napili isip LGU with best practices for COVID-19 Center sa 1st Regional Disaster Risk Reduction Management in Health Summit sa Department of Health Central Visayas sa niaging adlaw.
Matud ni Rama nga ang mga tawo sa EOC Cebu City nagtrabaho 24/7, ang mga barangay usab, simbahan, volunteers ug uban pa naningkamot aron magmalamposon sa giatubang nga hagit sa COVID-19 pandemic.
“The unity was being felt and that recognition really goes to everybody”, matud ni Rama.
Gawas sa maong pasidungog nga nadawat sa Cebu City Government, ang siyudad nakadawat usab og certificate of recognition gikan sa Department of Health, Department of Interior and Local Government ug sa National Task Force on COVID sa outstanding performance sa siyudad ug pagkab-ot sa pinakataas nga cumulative jab rate sa unang hugna sa National Vaccination Days niadtong Nobiyembre 29, 30 ug Disyembre 1, 2021.
Si Atty. Mat Eric Medalle chief of staff ni Rama ang nidawat sa pasidungog didto sa kaulohan sa niaging adlaw.
Si Rama nagkanayon nga makapasaka sa morale sa mga tawo nga naningkamot aron batokan ang COVID-19 ang mga pasidungog nga nadawat sa Siyudad sa Sugbo. (BANAT NEWS)
- Latest
