LLCPO moimbestigar sa beach party
CEBU, Philippines — Mopahigayon og imbestigasyon ang Lapu-Lapu City Police Office (LLCPO) sa posibleng kalapasan sa health and safety protocols sa usa ka beach resort sa siyudad nga nag-host og party niadtong Nobyimbre 20, 2021 sa gabii atol sa pagsaulog sa pista sa Birhen sa Regla.
Usa ka Facebook user nga adunay ngalan nga Olrich Soliano ang nag-post og video sa gipahigayong beach party atol sa nahisgutang kasaulogan.
Makita sa maong video sa mga tawo nga niapil sa maong beach party nga wala magsul-ob og face mask ug wala na usab masunod ang gipatuman nga social distancing.
Si Police Colonel Arnel Banzon, direktor sa LCPO nagkanayon nga mopahigayon sila og imbestigasyon sa maong insidente diin lakip sa ilang subayon kadtong tawo nga nag-post sa maong video diha sa Facebook.
Si Banzon nagkanayon nga gimandoan na niya ang iyang mga sakop sa pagsusi ug sa pag-coordinate sa hingtungdang resort.
Samtang si Mayor Junard “Ahong” Chan nagkanayon nga iyahang hatagan og kahigayonan ang kapolisan alang sa paghimo og imbestigasyon kalabot sa nahisgutang insidente. —BDB (BANATNEWS)
- Latest
