CEBU, Philippines — Palapdan sa Kagamhanan sa Siyudad sa Sugbo ang pag-instalar og koneksyon sa kuryente sa mga bukirang barangay ug ka-partner nila sa maong program mao ang Visayan Electric.
Matud pa ni Konsehal Phillip Zafra nga duna pay daghang mga lagyong lugar sa siyudad ang wala pa gyud naabtan sa kuryente.
Gitug-an sa konsehal nga nagkatigom na sila sa opisyales sa pipila ka bukirang barangay kauban ang President and Chief Operating Officer sa Visayan Electric nga si Raul Lucero ug positibo ang resulta sa ilang diskusyon.
Importante ang pagbaton og kuryente sa mga lagyong lugar ilabi na sa mga mag-uuma nga kinahanglan alang sa pag-istablisar og koneksyon sa tubig.
Target sa kagamhanan nga sa tuig 2022, makabaton na og koneksyon sa kuryente ang tanang lagyong lugar.
"Mapasalamaton ko sa VECO gumikan kay nihatag gyud sila og assurance sa pagsuporta sa atoang programa," matud pa ni Zafra.
Aminado si Zafra nga duna puy pipila ka kadalanan sa kabukiran ang puwerting ngitngita ug maghatag kini og peligro sa mga motorista.
Gipaabot nga sunod buwan, anam-anam na nga mahatagan og kahayag ang maong kadalanan.
"Seguro sa pag-abot sa Pasko, pipila sa atoang mga kaigsounan sa mountain barangays ang makabaton na gyud og koneksyon sa kuryente. Duna na tay nasugdan niini sa milabay nga mga buwan. Target nato nga makompleto kini karong 2022," segun ni Zafra. —MEL (BANATNEWS)