CEBU, Philippines — Mga relihiyosong kalihukan ipahigayon sa Daughter of Saint Theresa DST diha sa Valladolid sa Dakbayan sa Carcar, dungan sa himoong pagtuki sa ‘Positio’ ni Archbishop Teofilo Camomot, didto sa Roma.
Ang ‘Positio’mao ang summary sa kinabuhi ni Camomot, apil na niini ang iyang biography, testimonies sa mga saksi ug ang katin-awan kun nganong angayan siya nga ideklarar nga santos sa simbahang katoliko.
Karong adlawa Martes, Nobyembre 9, 2021 himoon ang relihisoyong kalihukan diha DST nga sugdan sa unang misa sa alas dos sa hapon og tak-opan kini sa santos nga misa inig ka tungang gabii.
Matud pa ni Mother Louella Grace Buscato, superior general of the DST sisters, lakip sa mga liturgical activities nga himoon mao ang pagbayaw sa blessed sacrament, pag rosaryo, pagpamalandong hangtud nga moabot ang alas dose sa gabii.
Sumala pa ni Buscato, wala gayud mahibaw-I kun unsa nga oras didto sa roma ang pagtuki sa kinabuhi ni Archbishop Camomot, ug malaumon sila nga kini magmalampuson ug mopagawas ug decree unya si Pope Francis may kalabutan kang Camomot.
Samtang si Archbishop Jose Palma sa Archdiocese of Cebu, nitug-an nga adlaw nga Martes adunay tigum ang mga theologians sa Roma aron hisgutan og tukion ang mga kamatuoran sa Fame of Sanctity and Heroic Virtues sa Servant of God nga si Archbishop Teofilo Camomot.
Sumala pa sa Arsobispo, usa kini ka mahinungdanon nga adlaw sa canonization process sa sugbuanon nga Arsobispo, hinungdan iyang giawhag ang mga kaparian, relihiyoso ug mga layko nga ilakip sa ilang mga santos nga misa ug pag-ampo nga positibo ang resulta niini. —MEL (BANATNEWS)