CEBU, Philippines — Upat ka batan-on ang giimbargohan sa ilang bisekleta sa mga sakop sa City of Talisay-Traffic Operation and Development Authority (CT-TODA) sa niaging adlaw.
Kini human nga ang maong mga batan-on nakamugna og peligro sa mga motorista diha sa eskina sa Baranga Lawaan 1, Dakbayan sa Talisay.
Nakuha sa video footage ang paglabang sa upat ka batan-on diha sa Cebu South Coastal Road (CSCR) bisan og stop ang ilang signal.
Ang maong mga batan-on deriyot mapunggit sa mga nagdagan nga motorsiklo
maayo gani nga nakapreno ang mga nagmaneho sa motorsiklo ug nipasutoy usab og padagan sa ilang mga bisekleta ang mga batan-on.
Ang sakop sa CT-TODA nga nakabantay sa panghitabo dali nga nipahibawo sa iyang kauban nga nag-atang sa pikas eskina ug nipahunong sa mga batan- on.
Sayo pa, si Jonathan Tumulak, hepe sa CT-TODA nagkanayon nga madakop ang mga bisekleta kong dili kini motuman sa lagda sa karsada sama sa drayber sa motorsiklo o sakyanan.
Ang mga batan-on uban sa ilang mga ginikanan gipaubos og seminar sa wala pa nila makuha og balik ang ilang mga bisekleta. — Gabriel C. Bonjoc (BANAT NEWS)