Panawagan sa urban poor groups gidawat ni Fernandez

CEBU, Philippines — Pormal na nga gidawat ni kanhi Department of Interior and Local Government (DILG) undersecretary  Bimbo Fernandez ang panawagan sa nagkadaiyang urban poor groups  nga padaganon  siya pagka-mayor sa Siyudad sa Sugbo alang sa sunod tuig nga piniliay.

Matud ni Hal Atienza, co-convenor sa Movement for Transformative Politics (MTP) – Gahum sa Katawhan  nga karong adlawa  moduso si Fernandez sa iyang certificate of candidacy (COC). Sa dili pa kini moanha sa buhatan sa Comelec motambong una kini sa Santos nga Misa karong hapon.

Gihulagway ni Atienza nga susama  og baruganan si Fernandez sa pipila ka mga concern sa nagkadaiyang sektor hinungdan nga mao kini ang ilang suportahan.

Karong adlawa usab masuta kon independente o duna bay partido si Fernandez.

Gikataho nga adunay partido nga interesado nga mokuha kang Fernandez.

Sayo pa, gienderso si Fernandez  sa pipila ka urban poor  groups human nila nadunggan ang balita nga dili na modagan og balik  pagka-mayor  si Tomas Osmeña kinsa maoy pangulo sa Bando Osmeña Pundok Kauswagan (BOPK).

“Kining mga grupoha si Osmeña gyud ang ilang giiendorso. Pagkahibawo nila nga dili modagan og balik ang kanhi mayor nakahuna-huna sila nga mangita og bag-ong nawong sa politika ug si Bimbo gyud ang ilang nahuna-hunaan”, matud ni Atienza.

Si Fernandez usa kini sa mga sinaligan ni Osmeña diin nagsilbi kini kaniadto nga city administrator ubos sa administrasyon ni Osmeña. Dugang ni Atienza nga ubay-ubay na ang mga programa nga nasugdan ni Fernandez sa mga urban poor hinungdan nga gipasigarbo nila ang ilang pag-endorso niini. BDB (BANATNEWS)