Carto sketch sa killer ni Fernandez gipagawas

CEBU, Philippines — National Bureau of Investigation Central Visayas nipagawas na sila sa cartographic sketch sa giingong gunman ni Atty. Rex Fernandez.

Base sa cartographic sketch ang mamumuno gibanabanang 30-anyos kapin o kulang, 5’4 ngadto sa 5’6 ang gitas-on, dauton, ug brown ang pamanit.

Ang NBI-7 nanawagan karon sa katawhan nga tabangan sila sa pag identify sa maong gunman. Nakig-alayon usab ang pamilya ni Fernandez sa parallel investigation nga  gihimo sa NBI-7 samtang ang kapolisan naghimo sab og kaugalingong imbestigasyon bahin sa nahitabo. —Rowena D. Capistrano/IBM

Mga ginikanan maoy  gikiha sa kapolisan

Ginikanan sa duha ka menor de edad nga pirmeng madakpan sa curfew maoy gipasakaan og kaso sa kapulisan sa Dakbayan sa Talisay.

Si Police Lt. Col. Gerard Ace Pelare, pangu sa Talisay City Police Station nagkanayon nga sobra na sa kaduha ka higayon nadakpan sa curfew ang maong mga bata.

Makadaghan na sab nila gipahimangnoan ang mga ginikanan  apan wala sila mosanong hinungdan nga sila maoy gipasakaan og kaso.

Matud pa ni Pelare nga RA 7610 o Special Protection of Children Against Abuse, Exploitation and Discrimination Act ang kasong ilang gipasaka. Mao kini ang pinakauna sa Talisay nga ang ginikanan mga batang nagpabadlong maoy gipasakaan og kaso.

Matud ni Pelare pahimangno sa uban nga kung padayon sila nga masupakon sa lagda maabot sab ang panahon nga sila ang mahasol sa kaso.— IBM (BANATNEWS)