Drive-thru vaccination sa NOAH gibuksan na

CEBU, Philippines — Giawhag karon sa Siyudad sa Sugbu ang transport sector uban sa priority groups A2 ug A3 nga magpabakuna kontra coronavirus disease(COVID)-2019 diha sa bag-ohay lang gibuksan nga drive-thru vaccination sa New Normal Oasis for Adaptation and a Home(NOAH) complex diha sa South Road Properties(SRP).

Bisan og modawat sila sa tanang residente sa siyudad sa Sugbo si Atty. Jocelyn Pesquera, NOAH Manager miingon nga prayoridad nila ang mga senior citizens, dunay comorbidities ug transport sector.

“Importante para sad sa atoang commuting public na they will feel confident nga when they ride public vehicles like taxis and jeepneys nga ma-feel safe said sila,” sigon ni Pesquera. Kadtong gikan sa ubang Local Government Unit nga nagtrabaho sa siyudad welcome sab nga mo-avail sa maong serbisyo.

Giawhag ni Pesquera ang mga interesadong indibidwal o grupo nga magparehistro una online sa pabakunata.com sa dili pa moadto sa site sanglit ang vaccination ipahigayon man by appointment.

Aron pag process sa appointment kinahanglan nila mokonektar sa Vice Mayor’s Office, Vaccination Operations Center, o City Health Department.

Gipasabot ni Pesquera nga gikinihanglan kini sanglit angayan sab segurohon nga masigurong dili magmugna og problema sa traffic ang mga sakyanan o motor nga maglaray aron magpabakuna ang mga sakay niini. Sa usa ka adlaw, mahimo silang makabakuna og 150 ngadto na sa 300 ka sakyanan.

Dugang ni Pesquera hinay-hinay ang ilang paghimo sa maong initiative karon tungod kay obserbahan sab nila kun unsay pay angayang nga palambuon.

Sa miaging semana ang Konseho mihangyo sa Vaccination Board sa siyudad nga mohimo og initiative aron mas mahimong pang efficient ang rollout sa vaccination ilabi na sa public transport sector o commuter transport.

Si Konsehal James Anthony Cuenco, Chairman sa Committee on Transportation miasoy nga gikinahanglan unahon ang transportation sector gumikan kay ang mga naglangkob niini makonsiderar nga frontlines ning padayon nga pakigbatok sa COVID-19.

Mi-request sab ang Konseho sa mga miyembro sa Public Transportation sector - cooperative ug companies, public utility vehicles, operators, ug transport organization o association sa siyudad sa pag-submit og lista sa bona fide PUV drivers, conductors, dispatcher, ug empleyado ngadto sa Transportation Committee sa siyudad alang sa data gathering sa drive-through vaccination.

Bisan paman og gipaubos sa Modified Enhanced Community Quarantine (MECQ) ang siyudad ang public transportation padayon nga nag-operate.

Laing plano sa siyudad mao ang pag-establisar og pocket vaccination ug cluster vaccination sa barangays, tinguha nila nga ablihan ang 21 ka vaccination center aron pag-fast track sa vaccination program.

Gikatakda kini mag-abli ang siyudad og laing site sa usa ka university sunod semana.

Ang vaccination sites sa siyudad karon nahimutang sa University of Cebu Senior Highschool Building sa J. Alcantar Street Barangay Sambag 1 ug Banilad Campus, SM Seaside City Cebu, SM City North, Robinson’s Galleria, Ayala Center Cebu, Waterfront Hotel and Casino ug NOAH Complex. (BANAT NEWS)