CEBU, Philippines — Gilusad sa Cebu City Agriculture Department (CAD) didto sa kabukiran ilabi na sa ilang Taptap Plant Nursery ang pag-apod apod og libreng planting materials sama sa herbal, ornamental, forest ug fruit seedlings. Sa anunsyo sa CAD , abli kini gikan sa Lunes hangtud Biyernes, sa alas 8:00 sa buntag ngadto sa alas 5:00 sa hapon.
“Gihangyo namo ang pagsunod sa atong safety health protocol sama sa pagsul-ob sa face mask ug pag obserbar sa pagdistansya aron sa paglikay sa nasinati nato nga pandemya,” tipik sa statement sa CAD.
Nasayran gikampanya karon sa CAD ang pagpanom isip pag-abag usab sa tinguha nga dunay pagkaon ang matag pamilya ug pinaagi sa pagtanum makab-ot ang gitinguha nga food sustainability.
Kahinumdoman nga sa miaging tuig, gihimo na sa CAD ang maong klase nga programa apan gihimo kini sa ilang nursery sa patag nga bahin sa dakbayan, ug karong tuiga, naabot na kini sa kabukiran. MEL (BANATNEWS)