CEBU, Philippines — Giuyonan ni Talisay City Mayor Gerald Anthony Samsam” Gullas ang plano nga magbutang og dairy processing plant diha sa ilang siyudad.
Mibisita sa buhatan sa mayor ang mga representante sa Philippine Carabao Center PPC aron ipadayag ang maong plano nga daku og benepisyo sa mga Talisaynon.
Ang pagbutang og dairy processing plant kun planta sa paggama og gatas maoy kabahin sa plano sa PCC aron modasig sa mga namuhi og kabaw alang sa milk production.
Gipahibawo niini nga ang Campinsa Manipis Multi-Purpose Cooperative maoy benepisyaryo sa proyekto kun diin sila hatagan sa PCC og 50 ka kabaw aron maoy kakuhaan sa gatas.
Kun ugaling matuman kini ang Syudad sa Talisay maoy ikaduhang Local Government Unit (LGU) sa Sugbo nga adunay Carabao Milk Processing Plant.
Ang una mao ang lungsod sa Pinamungajan nga nahimo na karon nga atraksyon sa mga turista.
Suma pa ni Mayor Gullas nga uyon siya sa laraw apan kinahanglan kini nga ikonsulta sa engineering office kun duna pa bay lugar diha sa compound sa City Hall diin anha ibutang ang planta. Gitug-an sa mayor nga daghan siya og plano diha sa compound sa City Hall og usa na niini ang Dialysis Center alang sa tanan. —MEL (BANATNEWS)