Pangalan sa mga mayor gigamit og pangilad
CEBU, Philippines — Ang mga Local Government Unit sa Lungsod sa Consolacion ug Sogod nipahimangno sa publiko batok sa mga mangingilad kinsa giingong nigamit sa mga pangalan sa ilang mga mayor.
Sa Lungsod sa Consolacion, si Mayor Joannes Alegado ni-post diha sa iyang facebook page nga adunay scammer nga namiktima og manindahay og milk tea diin gigamit ang iyang pangalan.
"Ang biktima giorderan og 80 ka milk tea, fries ug nagpa-load pa gayud ang scammerug dako kaayo nga kantidad. WARNING gayud kong naay magpa-load ug mag- order ninyo og dagko nga kantidad. Ayaw dayon mo og tuo", matud ni Alegado.
Giawhag ni Alegado ang publiko nga labing maayo kong mo-double check ang tinder sa mga mopalit hilabina kong dinagko ang kantidad.
Gawas kang Alegado apil usab ang ngalan ni Sogod Mayor Richard Streegan nga gigamit sa pagpangilad sa mga business establishment o tindahan sa lungsod.
"Ilang scam modus, magpaload og dagko na kantidad kunohay apan dili diay mobayad. Among ipahibalo na dili kana sila konektado/representative sa buhatan sa mayor ug wala makaila ang atong Mayor kanila", pahibalo diha sa facebook page sa Lungsod sa Sogod.
Ang kagamhanan sa lungsod niawhag sa publiko nga kon makasugat og susamang hitabo nga nigamit sa pangalan sa mga opisyal sa lungsod mo-report dayon kani diha sa mga Sogod hotline number 09618177441; PNP(09229690556) ug Mayor’s Office (032 431-9159). —BDB (BANATNEWS)
- Latest
