CEBU, Philippines — Gibutyag sa head sa Cultural and Historical Affairs Office (CHAO) nga si Bryner Diaz nga importante kaayo nga dili baliwaon sa kabatan-onan ang pagsaulog sa “Araw ng Kagitingan” karong Abril 9.
Kinahanglan matud pa nga ipadayon ang pagtimbaya sa mga pinoy ilabi na sa mga beteranong sundalo nga nakatampo sa pagkab-ot sa kagawasan sa nasud.
Malaumon si Diaz nga hinumdoman gihapon sa bag-ong henerasyon ang sakripisyo sa mga Pinoy aron lang gyud makab-ot niini ang kagawasan.
“Ato pud hinumdoman ang gibuhat sa atong mga beteranong sundalo nga naningkamot gyud kaniadto nga dili mailog ang atong nasud sa kamot sa mga langyaw,” nagkanayon si Diaz.
Mapasalamaton usab siya sa Department of Education (DepEd) gumikan kay padayon gihapon nga nalakip sa ilang kurikulom ang kasaysayan o nangaging kasikas sa nasud.
Isip pagtimaan sa “Araw ng Kagitingan”, dili gyud wagtangon sa CHAO ang tinuig nila nga kalihukan sama nalang sa wreath-laying ceremony nga pagahimoon karong Abril 9 sa buntag diha sa Plaza Independencia. Matud pa ni Diaz nga tungod sa pandemya, limitado lang ang imbitado niini ug kini sama sa mga opisyales sa siyudad ingon man usab ang mga leader sa beterano.
Matud pa nga simple lang ang seremonya apan ang importante nga undanon kini ug mahimong tipik sa pagpresarbar sa bililhong kasaysayan sa nasud.
Duna pud silay pagahimoon nga webinar inig kahapon sa maong petsa aron tukion ang kasaysayan nga nakatatak na sa hunahuna sa mga Pinoy partikular na ang pagpanalipod sa nasud. MEL (BANATNEWS)