CEBU, Philippines — Nagtingkagol karon sa prisohan ang usa ka barangay kagawad sa Barangay Sawang Calero sa Dakbayan sa Sugbo human kini gipasanginlang maoy mipusil patay sa usa ka 33-anyos nga lalaking adunay kakulangan sa pangisip kagahapong adlawa.
Ang suspetsado giila nga si Sawang Calero Councilor Benjamin “Jaming” Zabate kinsa kanhi kapitan sab sa nahisgutang barangay. Si Zabate gidakop pila ka oras pagkahuman sa krimen sa duhang iyang napusilan ang usa ka Albert Rafols, 33, nga dunay kakulian sa pangisip.
Usa ka concerned citizen nga mihangyo nga dili magpahingalan mibutyag nga si Rafols nagtindog lang sa daplin sa dalan nianang tungora ug sa kalit lang miabot si Zabate ug walay daghang estorya giingong gidiretso niya kini pagpusil makausa ka higayon diha sa dughan.
Giingong naglakaw ra anang hitaboa si Zabate kuyog ang lain niyang kauban nga mura og walay nahitabo.
Si Sergio Ocaña, Kapitan sa Sawang Calero nikompirmar nga si Rafols gideklara nga patay na pag-abot sa hospital.
“Daghang mga estorya. Dili pa kami kaklaro kay usa sa mga estorya gud ani, kaning bataa naa man gud ni gamay. Unya bali, unsa kahay gisulti niya sa anak ni Jaming, nasuko ang amahan. Daghan kaayong mga e-estorya pero ako sang klarohon kay unya’g masipyat ta,” dugang niya.
Dunay mga alegasyon sab nga si Rafols giingong gikulata sab kaniadto ni Zabate pipila ka bulan ang nakalabay. Apan wala pay kompirmasyon gikan sa kapolisan bahin niini.
Nagpadayon ang kapulisan sa paghimo og follow-up nga imbestigasyon bahin sa maong hitabo.— IBM (BANATNEWS)